Учебник по английскому языку для 1 класса на узбекском языке.
Farzandlarimiz ingliz tili dunyosiga qiziqarli sayohatni boshlamoqda. Bu sayohat qiziqarli, tushunarli va omadli bo‘lishi uchun ularga sizning yordamingiz kerak bo‘ladi. Har bir darsdan keyin o‘tilgan darslarni mustahkamlash uchun uy vazifalari beriladi. Farzandingizga darsda o‘tilgan mavzularni bajarishiga va uni eslashiga yordam bering. Agar u o‘tilgan mavzudagi so‘zlarni va iboralarni eslay olmasa, xavotirga tushmang. Ularni keyingi safar aytib berishi mumkin. Hamma so‘zlar va iboralar darsma-dars takrorlanadi va farzandingiz vaqt o‘tishi bilan ularni eslab qoladi. Eng asosiysi, buning uchun hammamizga tirishqoqlik va sabr-toqat kerak bo‘ladi.
1-sinf davomida o‘qish va yozuvsiz ingliz tilini o‘rgatish usuli mamlakatimiz, qolaversa, butun dunyo til o‘qitish tarixida yangilik bo‘lganligi tufayli, u ayrim kamchiliklardan xoli emasligi tabiiy. Shu bois, o‘quv-metodik majmua yuzasidan bildiradigan fikrlaringiz biz mualliflar uchun qimmatlidir.
O‘quv-metodik majmua bolajonlarni zeriktirib qo‘ymaydi, aksincha, ingliz tilini o‘rganishga ishtiyoq uyg‘otish bilan bir qatorda olam-olam quvonch ham bag‘ishlaydi degan umiddamiz.
